Academy Music Group i weithredu Neuadd Dewi Sant

Dydd Gwener, 12 Medi 2025

Mae Academy Music Group Limited (AMG) wedi cyhoeddi heddiw ei fod wedi ymrwymo i gytundeb gyda Chyngor Caerdydd i redeg ac ailagor Neuadd Dewi Sant eiconig Caerdydd.

Bydd y cytundeb yn diogelu dyfodol y lleoliad, gan gadw Neuadd Gyngerdd Genedlaethol Cymru yn ganolbwynt i wead diwylliannol Caerdydd a sicrhau ei gwaddol fel lleoliad cerddoriaeth o’r radd flaenaf. Ar ôl ailagor, bydd Neuadd Dewi Sant yn cynnal rhaglen eclectig o ddigwyddiadau, gan ddatblygu a chefnogi rhaglen glasurol enwog a ffocws cymunedol y lleoliad law yn llaw â sioeau cyfoes.

“Mae Caerdydd yn ddinas fywiog sydd â sîn gerddoriaeth a chelfyddydol ffyniannus, ac rydym yn falch iawn o fod yn gallu dychwelyd un o’i lleoliadau pwysicaf yn ôl i flaen llwyfan ei chymuned ddiwylliannol”, meddai Liam Boylan, Prif Swyddog Gweithredol, Grŵp Cerddoriaeth yr Academi. “Mae gan Academy Music Group hanes hir o fuddsoddi mewn adeiladau diwylliannol pwysig a sicrhau eu bod yn parhau i fod ar agor ac yn ffynnu i genedlaethau’r dyfodol eu mwynhau. Mae Neuadd Dewi Sant yn gosod safon feincnod ar gyfer neuaddau cyngerdd ar lefel byd, ac rydym wrth ein bodd i allu sicrhau y bydd yn parhau i ddarparu adloniant rhagorol am flynyddoedd lawer i ddod.”

Dwedodd yr Aelod Cabinet dros Ddiwylliant, Parciau a Digwyddiadau, y Cynghorydd Jennifer Burke, “Dyma ddechrau pennod newydd a chyffrous yn hanes un o leoliadau cerddoriaeth pwysicaf Cymru. Bydd y buddsoddiad sylweddol y mae AMG yn ei wneud yn sicrhau bod adeiledd yr adeilad yn cael ei ddiogelu a’i gynnal am flynyddoedd i ddod. Yn ogystal â dod â rhai o’r artistiaid mwyaf cyffrous ym myd cerddoriaeth fyw gyfoes i Gaerdydd, bydd y cytundeb gydag AMG yn diogelu rhaglen glasurol y Neuadd a bydd yn golygu bod gan Gymru Neuadd Gyngerdd Genedlaethol i ymfalchïo ynddi unwaith eto. Mae Neuadd Dewi Sant yn lleoliad arbennig ar gyfer cynulleidfaoedd a cherddorion ledled Caerdydd, Cymru a thu hwnt. Rwy’n falch iawn y bydd y Neuadd o dan stiwardiaeth AMG yn croesawu cynulleidfaoedd yn ôl drwy’r drysau cyn bo hir ac yn ein helpu i gyflawni ein huchelgeisiau fel dinas gerdd.”

Fel rhan o’r cytundeb, bydd o leiaf 60 diwrnod o fewn calendr digwyddiadau brig y Neuadd ar gael i gynnal digwyddiadau clasurol allweddol, gydag 20 diwrnod ychwanegol o raglenni clasurol y tu hwnt i hynny. Bydd 10 diwrnod arall bob yn ail flwyddyn i gynnal digwyddiad Canwr y Byd Caerdydd y BBC yn y Neuadd.

Ychwanegodd Lisa Tregale, Cyfarwyddwr Cerddorfa a Chorws Cenedlaethol Cymreig y BBC: “Rydym yn croesawu’r cyhoeddiad heddiw fel cam pwysig wrth ailagor Neuadd Dewi Sant, fel cartref hanfodol ar gyfer cerddoriaeth glasurol a symffonig yng Nghymru. Mae Cerddorfa a Chorws Cenedlaethol Cymreig y BBC yn llawn cyffro y bydd y neuadd yn ailagor a byddwn nawr yn gweithio’n agos gydag AMG wrth i ni ddychwelyd i’r lleoliad cyngerdd unigryw hwn. Edrychwn ymlaen at berfformio o flaen cynulleidfaoedd ar y llwyfan o safon ryngwladol hwn.”

Mae’r pianydd cyngerdd enwog Charles Owen yn bersonol wedi dewis tri phiano grand Steinway newydd ar gyfer y Neuadd, a brynwyd gan Gyngor Caerdydd i gefnogi dyfodol rhaglen gerddoriaeth glasurol y Neuadd. Bydd y gofal drostynt – ynghyd ag organ hanesyddol y Neuadd ac offerynnau allweddol eraill – nawr yn cael ei ymddiried i AMG fel gwarcheidwaid newydd y lleoliad. Gan gydnabod ymhellach ei bwysigrwydd i amgylchedd diwylliannol y ddinas, mae AMG hefyd yn ymrwymo i Femorandwm Cyd-ddealltwriaeth gyda sefydliadau cerddoriaeth glasurol blaenllaw yng Nghaerdydd. Bydd y cytundeb hwn yn sicrhau parhad rhaglenni cymunedol ac addysg, gan gadw a datblygu rôl hanfodol y Neuadd ym mywyd diwylliannol y ddinas.

Ar ôl darganfod concrit awyredig awtoclafiedig cydnerth (RAAC) yn y lleoliad, bydd AMG yn buddsoddi’n sylweddol mewn gwaith adfer, gan gynnwys gosod to newydd, yn ogystal â seddi newydd yn yr awditoriwm i hwyluso cynnal sioeau amrywiol eu fformatau. Mae profion helaeth ac ymgynghori â Sandy Brown, yr ymgynghorwyr acwstig a gynghorodd ddyluniad gwreiddiol Neuadd Dewi Sant, wedi cadarnhau y bydd yr holl waith yn cynnal rhinweddau acwstig clodwiw y lleoliad.